كتابات

اطعموني من جوع وأمنوني من خوف ماشاني انا وهيكلة الجيش

ياجماعه اشتي واحد يقول لي انه مستفيد من تغيير قائد اللواء الفلاني او قائد المعسكر الفلاني او من نقل هذا القائد العسكري من هذه المنطقه لامنطقه ثانيه احنا يالمواطنين ايش اللي مستفيدينه
بأختصار سواء يتهيكل الجيش او مايتهيكل يقوده يهودا او تقوده ام الصبيان ??

افهموني الله يخليكم ???

المواد الغذائيه سعرها كل يوم يرتفع المرتبات وتخفظت بفعل الخصميات الحوافز والمستحقات طارت الكهرباء يوم تسبر ويوم تخرب البترول ومرتفع ويوم موجود ويوم معدوم البطاله وزادت اضعاف المشاريع وتوقفت طرق كهرباء ابار مياه سدود بناء مدارس بناء مستشفيات الجامعه وتغلقت الامن واصبح شبه معدوم الوضائف العامه وتوزعت وتخصصت ??

بالله عليكم هيكلة القوات المسلحه ممكن تفيديني ام هيكلة وزارة الخدمه المدنيه المصدر الاول للفساد الى جميع الوحدات الاداريه انا لما احتاج لعداد كهرباء يخرج بعد طلوع الروح وقيمته عشرين مره رشاوي للمختصين بطلعه من وزارة الكهرباء او من قيادة المعسكر لما يمرض عليا واحد من اسرتي وماالاقي مستشفى حكومي ولا اطباء مختصين ولا اجهزه ولاعنايه ووساطات ورشاوي ايش ممكن استفيده من تغيير هذا القائد العسكري او بقاء هذا بتوفير هذه الخدمات لما يخلص الماء وادور وايت ماء بخمسه الف ريال وحتى ماالاقيه من هو السبب ??

لما المدارس شبه فاضيه من غياب المدرسين والتسيب والضحيه ابني وابنك لما يسرقو سياراتك في عز الظهر او يختطفو ابنك او تنهب ارضيتك او يسرق منزلك او تغتصب حقوقك ومركز الشرطه جنبك تروح لاعندهم يقولو لك تعال بعد الغداء احنا مستعجلين نروح نتغدي وبعد الغداء تروح يشتو منك يومين معامله وحق طقم وسجل بلاغ وروح بيتك ابكي بحسرتك لما أكلنا كله مواد غذائيه منتهيه الصلاحيه من هو السبب??

انا ايش مستفيد من تغيير هذا القائد العسكري او بقاء هذا هم ليسو ضرر على المواطن ولاوجودهم فساد المواطن يريد مرافق خدميه خاليه من الفساد خدمات متوفره امن مستتب لقمه ياكلها هو واطفاله حقوق لاتسلب ولاتنهب المواطن يريد اطعام من جوع وأمن من خوف ??

بالله عليكم كلموني بعيدا عن المقاصد الحزبيه احنا كمواطنين ايش التغيير اللي حصل على شان نرفع القبعات للمتغنيين بالتغيير الفساد ينتشر ويزداد في كل مرفق اداري وخدمي وعلى مستوى الشارع واعيننا مثبته على لوحه جداريه باسماء القاده العسكريين والالويه لقد صار ابني الصغير شبه مغيب لاسماء القاده العسكريين والالويه ومن يتبع هذا اللواء ومن يتبع هذا المعسكر بينما لايعرف ماهي المواد المقرره عليه كونه لم يستلم الا نصف الكتب المدرسيه ولايوجد الا نصف مدرسي المواد الدراسيه ??

اتقو الله الى اين تقودو اليمن???

مقالات ذات صلة

إغلاق
إغلاق